 |
| حشيان الهدرة (أو الهضرة) وكلام مضحك بالدارجة المغربية |
تتميز اللغة الدارجة المغربية بنوع معين من الكلام يسمى حشيان الهدرة أو حشيان الهضرة، والمقصود به هو فن الرد المفحم على تصرفات وكلام الاخرين بعبارات غير مباشرة باستعمال المجاز والامثال الشعبية المضحكة والمعاني الرمزية والابيات الشعرية الشعبية المعبرة.
وفي هذا الموضوع بالقسم المغربي نعرض مجموعة من العبارات باللهجة المغربية التي يسميها المغاربة حشيان الهدرة، وهو كلام مغربي مضحك عبارة عن أمثال مغربية وكلام موزن في الغالب وأبيات شعرية شعبية بالدارجة المغربية ذات معاني بليغة، قراءة ممتعة:
حشيان الهدرة بالدارجة المغربية
- القرد في عين مو غزال
- العود لي تحقرو يعميك
- كزار ومعشي باللفت
- اش خصك يا العريان الخاتم يا مولاي
- ملي يزعم الفار حدا المش عرف الغار قريب
- حلان الفم يزيد الهم وما يشري لحم
- زغرتي يا موكة بلارج دار العرس
- الزين كايحشم على زينو والخايب كايخرج في عينو
- وجه الشارفة عمرو ما يخفى واخا تحكو بالحلفة
- الشيخة لي ما كتعرف تشطح كاتقول الارض عاوجا
- كون كان الخوخ يداوي كون داوا راسو
- من الخيمة خارج مايل
- ضرب البردعة يفهم الحمار
- الحر بالغمزة والعبد بالدبزة
- لي قال ليك قال عليك
- لي فاتك بليلة فاتك بحيلة
- حوتة واحدة تخنز الشواري
- لفتة مسلوقة احسن من بنانة مسروقة
- اجي يا مي نوريك دارخالي
- أش يعرف القليول لركوب الخيل
- لي عضو الحنش كايخاف من الحبل
- الجمل غادي في الطريق والكلاب كتنبح
- كون كنا نخافو من الدجاج كاع مانيرشوه
- الشيخة لي ما تعرف تشطح تقول الارض عاوجا
- الجمل ماكايشفوش الحدبة ديالو
- زواق يطير ويبقى غي القزدير
- حضاي حاضي الناس والدمدومة قاضي غراض
- المش مايديهاش في الفار ملي يكون قدام الغار
- الكلب النباح ماكايعضش غير كايحل فمو
- هبيل تزوج هبيلة وتهنات القبيلة
- نحلة وحدة احسن من شواري ديال الدبان
- غير بالمسطي باش كايجربو الناس الواد إلا قطع يقطعو وإلا داه يرجعو
- الطلاب يطلب ومرتو تصدق
- لي ما عندو فلوس كلامو مسوس
- ضصّر الكلب يلحسن ليك فمك
- بلا ما تغطي الشمس بالغربال
- كثرة الهضرة ما تشري خضرة
- لي زعم ياكل اللحم ولي حشم ياكل الشحم
- حك الكامون يعطي الريحة
- يطير الطير تايعيا يصيدو المش لي ما كايطيرش
- اخدم يا التاعس على سعد الناعس.
حشيان الهدرة للمزاح بين الأصدقاء
- شحال خايبة تكون داير ريحة غالية وأنت ما فيكش ريحت الرجولة
- الرجال كايديرو الفلوس والشمايت يتباعوا بالفلوس
- بني وعلي وسير وخلي
- جمع وخبي تاتحاسب عن ربي
- لي واكل حبة باخا لي طلباتها ليه يقول واخا
- علمناهم كيفاش يطيرو وفاش طارو بزقو علينا
- ديما هاداك لي كاتسمع عليه هضرة خايبة كايطلع راجل على لي عاودها ليك
- الواحد واخا يكون ملياردير يفقد القيمة ديالو ملي كايتجمع عليه الدبان
- لي واكل مخ الضبع كاتبان ليه المعزة غزالة
- هو في المقلة كايتقلى ومزال كايحنزز.
- كون كان البريق يعيق كاع ما يعطي قاعوا للحريق
حشيان الهضرة في شكل ابيات شعرية
 |
| كلام مغربي مضحك حشيان الهضرة |
- لي لقا راحتو في الهبال
- ما عندو ما يدير بالعقل
- الدنيا عمرها مـا كـانت نكارة
- الناس هي لي طماعة وغدارة
- لي حبك ما يـبنى ليك قصر
- ولي كرهك ما حفر ليك قبر
- كـلـشي فـي وقـتـو كـايكـون زويـن
- ولي زرب على خبزو ياكلو عجين
- زين الوجه كيزول
- وزين العقل كيطول
- كاين الراجل وكاين الرويجل وكاين سيد الرجال
- وكاين لي معاشر مع الرجال باش يتمسى راجل
- لي عرف راسو أش كايسوا
- مــا كـايـهمـو بـنـادم إلا دوا
- إلا حلفـوا فـيـك النسـا
- بات فايق ودير العسة
- كـايـن بنادم لي يعجبك من النظرة
- وكاين بنادم لي يعجبك بالـهـضـرة
- وكاين بنادم لي غلى من الذهب والنقرة
- وكاين بنادم لي تمنى ضربو بحجرة
- وكاين بنادم لي ما يسوى حتى بعرة
- وكاين لي عمرو صغير وعقلو كبير
- كاين لي عمرو كبير وعقلو صغير
اقرأ أيضا: أمثال مغربية مضحكة بالدارجة المغربية.